宕出来的王小毛
从横空出世到跃然纸上，从只闻其声到见字如面，《滑稽王小毛故事精选》终于跟大家见面了。
宕了三四年，王小毛故事总算宕出来了。
王小毛的故事，我从1987年5月开始讲，实实足足讲了25年，25年里向总共讲了1234只故事，我的编辑、主持人生涯三分之二以上的辰光搭精力侪是花勒辣迭桩事体上。
《滑稽王小毛》的题材贴近老百姓，反映伊拉甜酸苦辣的生活，表达伊拉喜怒哀乐的情感。大家侪觉得故事里向的人物赛过天天碰头，故事里向的事体像煞日日看到，觉得可亲可近。加上《滑稽王小毛》形式生动活泼，语言风趣幽默，呒没大话空话套话，老百姓喜闻乐见。
王小毛是一个有独特个性的艺术形象。伊热情善良、耿直诚实，憨厚中不失聪明，机灵时又寓纯朴。伊助人为乐又嫉恶如仇，但王小毛也勿是完美无缺的人，伊的缺点搭勿成熟使伊勒辣生活中常常闹出一眼笑话来。也正因为迭能，听众才觉得王小毛有血有肉。
不过勒辣25年里向，我是用广播小品的形式来讲述王小毛的故事的。勒辣王小毛诞生之前是呒没广播小品搿种讲法的，不过伊也确实采用了旁白解说、音乐音效迭些广播剧的常用手法，仔细听听伊又跟传统的广播剧勿大一样。老古闲话讲外甥像娘舅，王小毛的面孔像啥人呢？倒是跟舞台上的滑稽戏、独脚戏蛮像的，不管剧情铺排、风格色彩，还是方言运用、招笑手法上，侪跟滑稽戏、独脚戏有邪气深厚的血缘关系。所以有人讲《滑稽王小毛》就像袁隆平的杂交水稻一样，产量高，生命力强。
累，勒辣上海闲话里向叫吃力，也叫衰瘏。听过《滑稽王小毛》的人侪讲，听到滑稽的地方会哈哈大笑，听到幽默的地方就会心一笑，总之是比较轻松愉悦的。呒没一个人会听王小毛听了吃力煞，衰瘏煞了，不过假使真的让侬读剧本，恐怕就不是一件邪气轻松愉悦的事体了，作兴侬会觉得读起来蛮吃力，蛮衰瘏。因为读剧本毕竟是从事演剧专业人士的生活。
现在我拿剧本改写成通俗的口语化的故事，搿能一来，估计侬读王小毛就跟听王小毛一样轻松愉悦了。
不过要让读者阅读王小毛故事的辰光勿觉得吃力、衰瘏，对编著者来讲本身就是一桩蛮吃力搭衰瘏的事体，因为剧本写法是通篇人物对话，只有少量的旁白解说，而故事却要以叙述情节为主，人物对话为辅，迭个转换就是改写，甚至重写，蛮吃力、蛮衰瘏。迭个就是王小毛宕仔长远的原因之一。
近年来，我也一直勒辣从事上海闲话的保护搭传承工作，所以搿本故事集也力图体现出沪语特色，拿你我他转换成侬吾伊，尽量保持《滑稽王小毛》的原汁原味，让读者一边阅读一边脑子里就赛过勒辣听吴侬软语、方言杂陈的《滑稽王小毛》节目。顺带便也可以起到帮助青年人、小朋友、新上海人学讲上海闲话的作用，为保护传承上海闲话出一份力。想法蛮好，不过真的上手做，倒真的有点吃力、衰瘏。有一位朋友看了我一篇改写的电子稿，点评讲：喔唷，侬搿本书倒是烦花哎！我以为朋友是表扬我已经达到《繁花》的水平，我谦虚地讲：过奖过奖，勿敢当。 啥人晓得迭个朋友讲：侬用上海闲话来写，既烦又花功夫，是搿个烦花。哈哈一笑之余，我并呒没改变初衷，我想假使能够起到体现上海特色搭保护传承上海闲话的作用，迭点烦花，迭点吃力、衰瘏也是值得的。当然迭个也是本书比较宕的原因之二。
宕的第三个原因，是我有一眼眼忙，虽然早就用勿着每天朝九晚五了，但是作品编创、群文辅导、非遗评审、讲座报告、编剧导演、艺术探讨、沪语传承、微信公号等，杂格拢东、投五投六，总归静勿下心来，猢狲屁股坐勿定，轧勿出整块头的辰光来选稿编稿。
现在常庄有人会对我讲：我是听着侬的王小毛长大的。老底子，我每天侪是一边做功课，一边开只半导体听王小毛的。我现在还常庄拿当年听过，到现在还记牢的王小毛故事讲拨我的小囡听。
看到介许多的听众、读者对王小毛的喜爱、怀念搭期待，促使我提起精神，克服困难，拿搿本书宕出来了。
其实宕关宕，慢关慢，但是事体一直呒没停歇过，反倒是慢工出细活了。
迭本故事集精选的60篇王小毛故事，基本涵盖了25年中勒辣王小毛身上发生的故事。从1987年的初到上海，到反映改革开放题材的三封电报；从王小毛个人的初恋风波，到热心社区治理的关键一票；从王小毛不谙世事的车站受骗，到嫉恶如仇为民除害的狭路相逢；从路不拾遗的公园约会，到孝敬长辈的中奖之谜；从坚持职业操守的八面来风，到反腐倡廉的廉尚往来等，王小毛的故事犹如生活万花筒，五彩缤纷，主题搭观念也是与时俱进。
看迭本故事集，不管侬是默读，还是朗读，侪建议侬转换一下阅读思维模式，用上海闲话来看来读，会更加有趣！
迭本故事集还邪气适合作为单位同事、亲戚朋友、父母子女之间勒辣休闲、联欢、旅途、茶余饭后辰光的讲述内容，希望侬看了王小毛的故事，拿伊再讲拨别人听，让侬成为受人欢迎的故事大王。
1200多集《滑稽王小毛》现在只不过选了60篇，好白相的故事行情行市，说勿尽讲勿光，阿拉笃悠悠，慢慢道来。
我相信侬一定勿会嫌鄙搿本宕出来的王小毛，希望侬欢喜搿个宕法宕法宕出来的王小毛。
葛明铭
2021年7月2日
葛明铭·编著
葛明铭，被誉为滑稽王小毛之父，为上海民间艺术家协会副主席，上海曲艺家协会副主席，上海故事家协会副主席。1987年创办广播系列小品《滑稽王小毛》，自任编导，并主持王小毛信箱。
书单推荐
